| ۷ |
| بنیاد |
| ” عقل مند آدمی نے ۔۔۔ چٹان پر اپنا گھر بنایا “ — (متی ٧: ٢٤) |
یسوع ناصری نے پہاڑی وعظ کا اختتام اِن الفاظ سے کیا:
” پس جو کوئی میری یہ باتیں سنتا اور اُن پر عمل کرتا ہے وہ اُس عقل مند آدمی کی مانند ٹھہرے گا جس نے چٹان پر اپنا گھر بنایا اور مینہ برسا اور پانی چڑھا اور آندھیاں چلیں اور اُس گھر پر ٹکریں لگیں، لیکن وہ نہ گرا کیونکہ اُس کی بنیاد چٹان پر ڈالی گئی تھی۔ اور جو کوئی یہ باتیں سنتا ہے اور اُن پر عمل نہیں کرتا وہ اُس بے وقوف آدمی کی مانند ٹھہرے گا جس نے اپنا گھر ریت پر بنایا اور مینہ برسا اور پانی چڑھا اور اُس گھر کو صدمہ پہنچایا اور وہ گر گیا اور بالکل برباد ہو گیا “ (متی ٧ : ٢٤ ۔٢٧)۔
جس گھر نے طوفانِ باد و باراں کا مقابلہ کیا اور قائم رہا اور جو گھر برباد ہو گیا اِن میں کیا فرق تھا؟
بنیاد کا!
عقل مند آدمی نے اپنا گھر ٹھوس چٹان پر بنایا۔ بے وقوف آدمی نے اپنا گھر بے قیام ریت پر بنایا۔ پاک صحائف میں خدا نے اپنے پیغام کے لئے چٹان جیسی ٹھوس بنیاد ڈالی ہے، کیونکہ وہ چاہتا ہے کہ ہر شخص اس پیغام کو سمجھے اور اس کا یقین کرے۔ یہ بنیاد ہے توریت ۔
شروعات کی کتاب
موسی' کی توریت میں بائبل مقدس کی پہلی پانچ کتابیں شامل ہیں۔ پہلی
یا افتتاحی کتاب کا نام ہے ” پیدائش “ (کیتھولک ترجمہ ” تکوین “ ) جس کا مطلب ہے اصل، ابتدا، شروع یا وجود میں آنا۔ پیدائش کی کتاب ” شروعات “ کی کتاب ہے جس میں خدا نے کئ باتوں کی شروعات بیان کی ہیں مثلاً زمین، حیات، انسان، بیاہ، خاندان، گھرانے، قبیلے، معاشرے، قومیں اور زبانیں۔ پیدائش کی کتاب زندگی کے بہت بڑے بڑے رازوں کا جواب دیتی ہے۔ خدا کیسا یا کس کی مانند ہے؟ انسان دکھ کیوں اُٹھاتا ہے؟ کامل خدا ناقص انسانوں کو کیسے قبول کرتا ہے؟
اِن اہم سوالوں اور دوسرے سوالوں کے جوابات کی تفصیل تو بائبل مقدس بعد میں دیتی ہے، مگر پیدائش کی کتاب میں خالق نے اپنے جوابات کی بنیاد رکھ دی ہے۔ بائبل مقدس کی پہلی کتاب بعد میں آنے والی ساری باتوں کی بنیاد ہے۔
خدا کا پیغام
بائبل مقدس میں سینکڑوں واقعات کا بیان ہے جو ہزاروں سال کے عرصے میں وقوع پذیر ہوۓ۔ یہ سارے بیان مل کر ایک ہی کہانی بن جاتے ہیں، جو سارے زمانوں کی بہترین کہانی ہے۔ اِسی کہانی میں خدا نے ایک بڑا پیغام دیا ہے __ بہترین خوش خبری جس کا کبھی اعلان کیا گیا ہو۔
خدا کی اِس ڈرامائی کہانی میں بہت سے نقطہ ہاۓ عروج ہیں۔ ہم پاک نوشتوں میں سے گزرتے ہوئے آگے بڑھتے ہیں تو انجیل میں مرقوم ایک بلند چوٹی سامنے آتی ہے۔ ایک اَور حیرت انگیز نقطہ عروج بائبل مقدس کی آخری کتاب بعنوان ” مکاشفہ “ میں اچانک ہمارے سامنے آئے گا۔ ” مکاشفہ “ کا مطلب ہے ” نقاب اُٹھانا “ یا ” پردہ اُٹھانا “ یعنی چھپی ہوئی چیز کو ظاہر کرنا۔
اِس حقیقت کے باوجود کہ خدا نے اپنے منصوبے پر سے پردہ اُٹھا دیا ہے بہت سے لوگوں کے لۓ انسان کے بارے میں اُس کا منصوبہ ایک راز ہی ہے۔
اوّلین باتیں اوّل
بائبل مقدس میں ٦٦ کتابیں ہیں __ ٣٩ پرانے عہدنامے میں اور ٢٧ نئے عہدنامے میں۔ تاریخ کے کسی بعد کے زمانے میں رومن کیتھولک فرقے نے (چند دوسرے پروٹسٹنٹ فرقوں کی طرح جو کلیسیا کی روایات کو خدا کے کلام سے بلند تر درجہ اور اعزاز دیتے ہیں) پرانے اور نئے عہد ناموں کے درمیان ١١ کتابوں کا اضافہ کیا۔ اِن کتابوں کو اپاکرفا ( Apocrypha ) یعنی غیر مستند یا مستند درجہ دوم مانا جاتا ہے۔ یہ کتابیں پرانے عہدنامے اور نئے عہدنامے کے درمیانی زمانے میں لکھی گئیں۔ اِن میں دلچسپ اور اہم تواریخی اور داستانوی معلومات مرقوم ہیں۔ عبرانی ایمان داروں نے انہیں کبھی بھی الہامی نوشتے تسلیم نہیں کیا۔ ١٩٤٧ عیسوی میں بحیرہ مردار سے جو طومار دریافت ہوئے اُن میں سے بیشتر طومار تفسیریں ہیں۔ مگر اِن میں بھی صرف پرانے عہدنامے کی ٣٩ کتابوں کی تفسیر کی گئی ہے۔ اِن غیرالہامی کتابوں کی کوئی تفسیر نہیں۔ مسیحِ موعود نے اپنی زمینی زندگی کے دوران کئی دفعہ پرانے عہدنامے سے اقتباس کیا، لیکن اِن غیر الہامی کتابوں سے کبھی کوئی اقتباس نہیں کیا۔ نئے عہدنامے میں اپاکرفا (غیرالہامی کتب) سے کوئی اقتباس نہیں کیا گیا۔ پرانے عہدنامے میں شامل ٣٩ کتابیں اُن نبیوں نے لکھیں جن سے خدا براہِ راست کلام کرتا تھا اور جن سے اپنے کلام کی تصدیق کرتا تھا ، اور ” نشانوں اور عجیب کاموں اور طرح طرح کے معجزوں اور روح القدس کی نعمتوں کے ذریعہ سے اُس (کلام) کی گواہی دیتا “ تھا (عبرانیوں ٢ : ٤)۔ اور جہاں تک نئے عہدنامے کا معاملہ ہے تو ایمان دار جو مسیح کی زندگی کے فوری بعد کے دنوں میں حیات تھے اُنہوں نے رسول کے اختیار اور سند کو قبول کیا اور نئے عہدنامے کے نوشتوں کو پرانے عہدنامے کے نبیوں اور نوشتوں کے برابر قرار دیا اور مانا۔ مگر اپاکرفا کے بارے میں یہ بات نہیں کہی جا سکتی۔ بائبل مقدس کے ١١٨٩ ابواب ہیں۔ ان میں سے ٥٠ باب پیدائش کی کتاب میں ہیں۔ پوری بائبل مقدس کو بے رُکے پڑھنے میں تین دن اور تین راتیں لگ سکتی ہیں۔
اپنے مجوزہ سفر کے دوران ہم بہت سے واقعات پر دھیان نہیں دیں گے۔ لیکن اُن کلاسک اور کلیدی واقعات پر ضرور غور کریں گے جو بنی نوع انسان کے لئے خدا کے حیرت ناک منصوبے کی ” بڑی تصویر “ بناتے ہیں۔ ہمارے سفر کا بہت زیادہ وقت بائبل مقدس کے پہلے چار ابواب کے مطالعہ میں گزرے گا، اِس لئے کہ اِن شروع کے اوراق میں اُن عظیم سچائیوں کا انکشاف ہوتا ہے جن کا ذکر خدا کے کلام میں دوسری جگہوں پر بھی آتا ہے۔
بائبل مقدس کے پہلے چار ابواب کی اہمیت اور معنویت کسی طرح بھی کم نہیں۔
ہم کسی بچے کو کہانی ستاتے ہیں تو کہاں سے شروع کرتے ہیں؟ کیا کہیں درمیان سے شروع کرتے ہیں اور کود کر اختتام پر آ جاتے ہیں اور آخر کے دوچار جملے سنا دیتے ہیں؟ نہیں، بلکہ ہم شروع سے شروع کرتے ہیں۔ مگر جب پاک صحائف یعنی بائبل مقدس کا معاملہ ہوتا ہے تو بہت سے قارئین صرف چیدہ چیدہ حصے پڑھتے ہیں۔ کیا یہی وجہ نہیں کہ اُن کے لئے خدا کی کہانی ایک راز بنی رہتی ہے کہ وہ خدا کی کتاب کے ابتدائی صفحات پر نظر نہیں ڈالتے؟ اِس لۓ کوئ تعجب کی بات نہیں کہ لوگ احمد سے مطابقت رکھتے ہیں جس نے اپنی ای میل میں لکھا ” یہ سارے گنہگاروں کا معاملہ میرے نزدیک بے معنی ہے “ (باب ١)
اگر ہم خدا کی کہانی کی شروعات سے ناواقف ہیں تو باقی کہانی کو سمجھنا اور اُس کی قدر و قیمت کا اندازہ لگانا ہمارے لئے مشکل ہوگا۔ لیکن پہلے چند ابواب کو ایک دفعہ سمجھ لیا تو باقی باتیں بھی سمجھ سکیں گے اور سمجھیں گے تو دم بخود رہ جائیں گے۔
بیج کی مثال
گندم کے صرف ایک دانے کا تصور کریں۔ یہ کوئی بڑی چیز معلوم نہیں ہوتا، لیکن اِس معمولی نظر آنے والے بیج کے اندر وہ مکمل اور پیچیدہ اشارے اور قواعد اور قوت چھپی ہوئی ہے جو دانوں سے بھرا ہوا پورا، مکمل پودا پیدا کرنے کے لئے درکار ہے۔ بائبل مقدس اِس عمل کی وضاحت کرتی ہے۔
” زمین آپ سے آپ پھل لاتی ہے۔ پہلے پتی، پھر بالیں، پھر بالوں میں تیار دانے۔۔۔ “ (مرقس ٤: ٢٨ )۔
خدا نے پھل اور سبزیاں ایسے نہیں بنائیں کہ فوراً پک جائیں اور نہ اُس نے اپنی کہانی ایسے مرتب کی ہے کہ پورا پیغام یک دم ظاہر ہو جائے۔ خدا نے انسان کے بدن کو خوراک مہیا کرنے کے لئے پودوں کا نظام وضع کیا جو بتدریج بڑھتے ہیں۔ اِسی طرح انسان کو روحانی خوراک مہیا کرنے کے لئے سچائی کو تبدریج ظاہر کرنے کا طریقہ پسند کیا۔
” ۔۔۔ حکم پر حکم۔ حکم پر حکم۔ قانون پر قانون۔ قانون پر قانون ہے۔ تھوڑا یہاں تھوڑا وہاں “ (یسعیاہ ٢٨: ١٠ )۔
پیدائش کی کتاب زمین کے ایک زرخیز قطعے کی مانند ہے جس میں خدا نے نفاست کے ساتھ سچائی کے ” بیج “ بو دیئے ہیں۔ اِن بیجوں سے اُس کی سچائی پھوٹتی ہے اور بائبل مقدس کی دوسری کتابوں میں بڑھتی اور کمال کو پہنچتی ہے اور دنیا کو تازگی اور زندگی پیش کرتی ہے۔
ایک جنین
جدید ٹیکنالوجی کا شکریہ۔ پہلے جو باتیں چھپی ہوئی اور راز تھیں اب دیکھی جا سکتی ہیں۔ مثال کے طور پر آج کل ہم ماں کے پیٹ میں نشو و نما پاتے ہوئے انسانی جنین کے واضح نقوش دیکھ سکتے ہیں۔ حیرت انگیز! ایک بارور انڈا ماں کے رحم میں آٹھ ہفتوں کی نشوو نما کے بعد مونگ پھلی کے برابر بچہ بن جاتا ہے۔ اُس کی آنکھیں، کان، ناک، منہ، بازو، ہاتھ ٹانگیں اور پاؤں سب کچھ مکمل ہوتا ہے۔ یہاں تک کہ اُس کی اُنگلیوں کے منفرد نشان بھی ہوتے ہیں۔ اگرچہ وہ پورے طور پر نہیں بنا ہوتا لیکن اُس کے سارے اعضا ہوتے ہیں۔
اِسی طرح ہم جانتے ہیں کہ خدا کی اپنے بارے میں اور انسانوں کے لئے اُس کے منصوبے کی ہر ایک ضروری اور بنیادی سچائی جنینی حالت میں پیدائش کی کتاب میں ملتی ہے۔ مگر ” خدا کا پوشیدہ مطلب “ __ مکاشفہ ١٠ :٧ __ دوسرے مکمل شدہ نوشتوں میں بڑھ کر کاملیت کو پہنچتا ہے۔
خدا کی ذات اور اُس کے مقاصد آج تک بہت سے لوگوں کے لئے ایک راز ہیں، حالانکہ اِس کی ضرورت نہیں اِس لئے کہ ” وہ بھید جو تمام زمانوں اور پُشتوں سے پوشیدہ رہا اب اُس کے مقدسوں پر ظاہر ہوا “ (کلسیوں ١: ٢٦ )۔
خدا دعوت دیتا ہے کہ ہم اُس کے بھید کو سمجھیں، لیکن شرط یہ ہے کہ ہم اِسے سمجھنا چاہیں۔
چیدہ چیدہ حصے
بائبل مقدس کسی حد تک ایک آڑاکٹا معما ( jigsaw puzzle
اِس کے بعض ٹکڑے کہاں اور کیسے فٹ ہوتے ہیں وہ تو واضح ہے، لیکن بعض ٹکڑے ایسے واضح نہیں ہیں۔ اُن کے لئے صبر اور استقلال کی ضرورت ہے۔ اِسی طرح وقت صرف کر کے خدا کے کلام پر غور و خوض کرنے سے اُلجھنیں اور غلط فہمیاں دُور ہوں گی اور خدا کا مربوط اور یک رنگ منصوبہ نظر آۓگا۔ حال ہی میں مجھے لبنان کے ایک ہونہار صحافی سے خط و کتابت کرنے کا شرف حاصل ہوا۔ تاحال ہماری ملاقات نہیں ہوئ مگر ہم دوست بن گئے ہیں۔ اُس نے اپنی پہلی ای میل میں مجھے لکھا: ” مَیں یہ نہیں مانتا کہ قطعی سچائی کے بارے میں کسی حتمی فیصلے پر پہنچنا ممکن ہے۔ “ مَیں نے اُسے ترغیب دی اور تاکید کی کہ اپنے پہلے سے قائم کئے ہوئے نظریات اور تعصبات کو ایک طرف رکھ کر بائبل مقدس کا خود مطالعہ کرے۔ بائبل مقدس کو خود اپنے لئے بولنے دے۔ وہ ایسا کر رہا ہے جیسا کہ اُس کی اِس ای میل سے ثابت ہوتا ہے: ” مَیں نے عربی زبان میں نیاعہدنامہ پڑھ لیا ہے اور اب پرانا عہدنامہ پڑھنے کا ارادہ رکھتا ہوں۔ پہلے مَیں نے صرف کہیں کہیں سے پڑھا تھا۔ مَیں نے جو بہت سے سوال پوچھے تھے اَب اُن کے جواب سامنے آ رہے ہیں۔ اِس دفعہ پڑھنے سے کیا فائدہ ہوا ہے؟ بائبل مقدس کے پیغام کے لۓ گہری عزت۔ اب مَیں سمجھتا ہوں کہ یہ انسان کی زندگی کو بدلنے والی قوت ہے۔ یہ کوئی سخت اور بے لچک فرائض کا مجموعہ نہیں جو ادا تو کئے جاتے ہیں لیکن کسی کو بدلتے نہیں۔ مَیں نے دریافت کیا ہے کہ جو کچھ ہمارے ہاتھوں میں ہے اُس کے بارے میں یقین کرنے کا ایک طریقہ، ایک راستہ ہے۔ “ حال ہی میں اُس دوست نے اِس رائے کا اظہار کیا ہے: ” مَیں نے وہ قدم اُٹھایا ہے جو مجھے بہت عرصہ پہلے اُٹھانا چاہئے تھا۔ مجھے احساس ہوا ہے کہ صرف یہ کہنا کافی نہیں 'مَیں نے بائبل پڑھی ہے۔' یہ ایسی کتاب ہے جسے مسلسل پڑھتے رہنا چاہئے۔ حیرت کی بات ہے کہ میرے بہت سے سوال اِس کتاب کے سایہ میں غائب ہو گئے ہیں۔ “ اُس آدمی کے لئے خدا کا پیغام اُبھرنا اور ظاہر ہونا شروع ہو گیا ہے۔ ہمارا عنقریب شروع ہونے والا سفر تاریخ کے عظیم معمے کے اہم ٹکڑوں کو اکٹھا کرے گا اور خدا کی حیرت انگیز کہانی اور پیغام صاف اور واضح ہو جائے گا۔ ہم خود بائبل مقدس کو ” مسلسل پڑھتے “ رہیں گے تو ہمیں معلوم ہو گا کہ دوسرے ” ٹکڑے اور اجزا “ کہاں کہاں فٹ ہوتے ہیں۔ محبت نامے ایک سپاہی کی کہانی سنائی جاتی ہے جسے ایک خاتون سے محبت تھی۔ اُسے اُس خاتون سے گہرا عشق تھا۔ مگر اُس خاتون کے اُس سپاہی کے بارے میں احساسات کیا تھے، یہ واضح نہیں۔ ایک وقت آیا اُس سپاہی کو کسی دُور کے ملک میں بھیج دیا گیا۔ وہ وفاداری کے ساتھ اُس خاتون کو خط لکھتا رہا، مگر وہ اُسے کبھی خط نہ لکھتی تھی۔ آخرکار اُس سپاہی کی واپسی کا دن آ گیا۔ واپسی پر وہ سیدھا اپنی محبوبہ کے ہاں پہنچا۔ وہ گھر پر ہی تھی اور اُس نے سپاہی کو دیکھ کر خوشی کا اظہار کیا۔ وہ بیٹھے باتیں کر رہے تھے اور کمرے میں ایک کونے میں پڑا گرد و غبار سے اَٹا ہوا ایک بکس اُس عورت کے دل کی اصل کیفیت کو ظاہر کر رہا تھا۔ وہ اُس سپاہی کے خطوط سے بھرا ہوا تھا __ اور ایک بھی خط کھلا نہ تھا! آسمان سے زمین پاک صحیفے خدا کی طرف سے آپ کے نام خطوط ہیں۔ اِن نوشتوں سے آسمان اور زمین کا خالق اور مالک آپ سے اپنا تعارف کرا رہا ہے۔ وہ اپنی محبت دکھا رہا ہے اور آپ کو بتا رہا ہے کہ آپ کس طرح اُس کے ابدی گھر میں خوشی اور جلال کے ساتھ رہ سکتے ہیں۔ ہم ایک ” خط “ کا اقتباس پیش کرتے ہیں جو خدا نے تقریباً ٢٧٠٠ سال پہلے اِس زمین کے باشندوں کو بھیجا: ” اے سب پیاسو پانی کے پاس آؤ اور وہ بھی جس کے پاس پیسہ نہ ہو۔ آؤ مول لو اور کھاؤ۔ پاس آؤ! مَے اور دودھ بے زر اور قیمت خریدو۔ تم کس لئے اپنا پیسہ اُس چیز کے لئے جو روٹی نہیں اور اپنی محنت اُس چیز کے واسطے جو آسودہ نہیں کرتی خرچ کرتے ہو؟ تم غور سے میری سنو اور وہ چیز جو اچھی ہے کھاؤ اور تمہاری جان فربہی سے لذت اُٹھائے گی۔ کان لگاؤ اور میرے پاس آؤ۔ سنو اور تمہاری جان زندہ رہے گی اور مَیں تم کو ابدی عہد یعنی داؤد کی سچی نعمتیں بخشوں گا۔ ۔۔ کیونکہ جس قدر آسمان زمین سے بلند ہے اُسی قدر میری راہیں تمہاری راہوں سے اور میرے خیال تمہارے خیالوں سے بلند ہیں “ (یسعیاہ ٥٥ :١۔٣، ٩ ) ۔ بہت بہت پیار ” تمہارا خالق “ کیا آپ نے وہ خط کھولے ہیں جو اُس نے آپ کو بھیجے ہیں؟ کیا آپ نے وہ خط پڑھے ہیں؟ کیا آپ نے اُسے جواب دیا ہے؟ کوئی ردِ عمل دکھایا ہے؟ آیئے، سفر شروع کریں!
ای میل
ای میل
ای میل