بائبل کے مخالف جھوٹے

علامہ طالب الدین

Objectors to the Bible

Published in Nur-i-Afshan October 10, 1889
By Rev. Talib-u-Din

 اِنسان جو سہو کا مضغہ ہے اور تمام عمر غلطی پر غلطی  بھول پر بھول  کرتا رہتا ہے اور بعد از مرگ  چند دن کے لئے یاد  آنا ہے اور پھر نسیًا منسیًا  ہو جاتا  ہے اُس کی کیا بضاعت کہ وہ اسرار  ربانی کے باریک اور ملائیم  السطح راستہ پر بغیر ہدایت قدم تعقل دھرے اور نگرے۔ اگر کوئی عقلمند ایک انچ کا  پیمانہ  نبا کر کلکتہ اور لندن کے درمیانی فاصلہ کو پیمایش کیا چاہے تو دیکھینے والے  ضرور ایسے دور اندیش کی عقل پر قہقہہ مارینگے ۔ کیونکہ  نہ تو یہہ امکان ہو سکتا ہے کہ اِس عقل کے دشمن کی عمر کامیاب  ہونے تک وفا کریگی اور نہ یہ گمان  ہو سکتا ہے کہ اگر بفرض  محال  عمر کا طول پورا بھی نکلے تو اُسکو وہ سامان اور اسباب میسر آئینگے جن سے راستے کے خطرات و خدشات  پر غالب  آسکے۔ بلکہ برعکس اِسکے یہہ نظر  آتا ہے کہ یہہ  پیمانہ  مصیبتونکے تیز کنارونسے  گھِس گھِس  کر انجام کار ٹوٹ  جائیگا۔ کوسوں تک کا سمندر۔ سمندر میں کی  ہزاروں  بلائیں۔ زاد راہ کی کمیت۔ امداد کی قلت وغیرہ  حوارث  ناگزیر سے بغیر کشتی کیونکر بچیگا۔ اسی طرح اُس آدمی کا حال ہے جو عقل کے سریع الزوال  دولت لیکر خدائے حی القیوم  کی ہستی بے  بدل کا سراغ لگانا چاہتا ہے۔ پہلے چادر کے پہنے کو جانچنا چاہئے اور پھر پاؤں  پھیلانیکی  تدبیر کرنا چاہئے کہاں خدائے بے ہمتا کہاں آدمی خطا کا شکار۔ کہاں وہ ہستی  جسکے حقمیں یوں تسلیم کیا جاتا ہے کہ وہ کالق الافلاک صانع الموجودات ہے۔ کہ وہی مرکز نور ہے جسکے اردگرد  سیارگاں  گھوم گھومکر  روشنی پاتے ہیں کہ وہ  ایسا کاریگری جسکے دستقدرت نے ستارونکو ایسی ترتیب اور استقامت  بخشی ہے کہ وہ زمانونسے  بے ستون  معلق کھڑے ہیں۔ آدمی اور چیونتے میں تو بلحاظ قدر منزلت کچھ نسبت ہے لیکن خدائے لا محدود اور انسان مین کچھ بھی نسبت متصور نہیں ہوسکتی  تو پھر ایسے خدا کو جو نادیدنی ہے  عقل  اور علم کی آنکھ کیونکر دیکھ  سکے اگر منطق ہے تو منطق  اُسقیدر کار گر ہو سکتا ہے جہانتک  اُسکا  دایرہ ہے اگر طبعیات ہو تو  اُسیقدر عمل  درآمد  ہو سکیگا جہانتک  مضردومرکب کی قید  ساتھ ہے لیکن ہم  تو خدا  اُس  ہی خدا کو کہتے ہیں جو ان تمام قیود  سے مبّرا ہے۔ منطق کے نشیب و فراز  کو امتحان کرو کہ منطقیونکی  آرا میں ہی کسقدر اختلاف ہے۔ کو ئی منطق کی تعریف کیسطرح  کرتا ہے اور کو ئی  کسیطرح  کوئی کہتا  ہے منطق صرف  خیال کو درست کرنے کا فائیدہ دیتا ہے کوئی  کہتا ہے نہیں یہہ غلط ہے اور  منظق صرف اِسی حالت میں واجب الاستعمال  ہے جبکہ  اُسکا عودان اشیاء پر ہو جو واقعی موجود ہیں۔ غرضکہ  کو ئی کسی مسئلے کو کسی طرح بیان کرتا ہے اور کوئی کسیطرح ۔ اب جبکہ اُس آلہ  میں جسکی مدد سے ہم ایک نادیدنی شے کو دریافت کیا چاہئے  میں ایسے نقص موجود ہیں  کہ اُسکو استعمال کرنیوالے بالاتفاق یک زبان نہیں تو ہم اُنکے نتائج  پر کیونکر  تکیہ کر سکتے ہیں اور پھر جبکہ یہہ دیکھتے ہیں کہ جسیانہ زبردست  لمحہ  منطقی یہہ ثابت کرتا ہے کہ  خدا نہیں ہے (لاحول ولا)  ویسا ہی عالم دیندار منطقی یہہ ثابت کرتا ہے کہ خدا ہے (الحمداﷲ) تو کیوں اُس دلیل کو زمانیں جو خیز بجانب ہے۔ اگر خدا انہو اور ہم کہیں کہ ہے تو ہمارا کیا نقصان اور اگر ہے اور ہم کہین نہیں تو بیشک ہمارا بہت برُا ھال ہو گا پس اگر علم طبعیات  ہے تو مادہ لو اور اُسکے پہلو سہلاؤ۔ نجوم ہو تو انم جہانکو۔ کیمیا ہے تو گھریا ڈھونڈو سونا چاندی  پگھلاؤ پر اِن  علموں سے خدا کو معدوم  ٹھہرانے کے لئے اسکے پیچھے کیوں پڑو  اُسکے پہچاننے کو اُسیکا  کلام ہے۔ کیا خوب کسی دانا نے کہا ہے اگر علم کا عمل  درست طور پر نہو تو مثل  آب و دانش  اُس سے بجائے فائدے کے لاکھوں نقصان اُٹھانے  پڑتے ہین بھلا اِس سے بڑہکر اور کیا نقسان ہو سکتا ہے کہ انسان اُمید اور تسلی کھو بیٹھے ۔جب آدمی یہہ سمجھ بیٹھے  کہ خدا  کو ئی چیز نہیں تو اُسکے پاس کیا باقی رہا۔ انہیں ایام میں مجھے ایک رسالہ دیکھنے کا اتفاق  ہوا جو برڈالا لامذہب کی تصنیفات  سے تھا۔ اگرچہ چکھنے مین میٹھا  تھا لیکن زہر قاتل  سے پرُ تھا۔ اُسکے لفظونمیں کچھ کچھ وہی مزہ پایا جاتا تھا جو باغ  عدن کی اُن دلفریب  باتونمیں  تھا جنہوں نے ہمارے بھولے باپ کو بہلا لیا۔  لیکن شکر ہے خدا کا کہ وہ اپنے بندوں  کو تریاق ہدایت عنایت کرتا ہے جس کے طفیل سے سم الحاد اُنپر تاثیر پزیر نہیں ہو سکتا مگر افسوس  اُن نوجوانونپر جو محض حجت اور بدعت کے لئےاور پھر نہایت شوق سے ایسی زہر آلود اور بداخلاق کتابونکا مطالعہ کرتے ہیں۔ میں نے اپنا فرض سمجھا کہ میں اُن خیالات کو ظاہر  کروں جن کی مدد سے مین اس ہلاہل  کی تاثیر سے بچاتا کہ اگر کوئی ا،س سنکھۓ کو چکھکر حالت کشمکش میں ہو گیا ہو شاید ان خیالات کو کام میں لاکر بحال ہو جائے۔ اب ہم اُس  رسالے کالب لباب  اپنے لفظونمیں بیان کرتے ہیں مصنف نے الفاظ ’’بڑھو اور پھلو‘‘ پر  چشمک کی ہے جو خدا نے آدم کو برکت دیتے وقت استعمال  کئے تھے اُسکا یہہ اعتراض  ہے ’’بڑہنا اور پھلنا آبادی کی ترقی کو کہتے ہین اور آبادی کی ترقی سے افلاس پھیلتا  ہے اور افلاس سے لوگوں کی حالت  روّی  ہوئی ہے پس یہہ برکت ہے یا اُسکے برعکس۔ چنانچہ  زیادہ آبادی کے سبب سے انگلستان  کا حال ایسا ہی ہو رہا ہے کہ لوگ افلاس کے ہاتھوں اپنا وطن چھوڑ  چھوڑ غیر ملکوں کو جا رہے ہیں غریب غربا کو محنت کا  موقع نہیں ملتا مزدوری دستیاب نہیں ہوتی مارے بھوک پیاس کے چلاتے ہیں سینکڑوں پادری پیکٹ پر سے مانگتے ہیں نہیں پاتے ۔ ڈھونڈتے ہیں اور اُنکو نہیں ملتا کھٹکٹاتے ہیں اور نہیں کھولاجاتا کیا بڑھنے اور پھلنے کی برکت دینے والا خدا سو گیا۔  کیا یہہ برکت پولٹیکل  اکانومی (سیاست مدن) کے اِس اصول سے متفق ہے کہ جہانتک ہو سکے آبادی کو کم رکھو تاکہ بھوک سے نہ مرو۔ کیا خدا سے یا پولٹیکل اکانومی سے ایسے معاملے میں صلاح لینی چاہئے  اور کس کا کہا ماننا چاہئے؟ دیکھنا کہیں اِن تڑیوں میں نہ آجائے۔ آؤ تو لفظ  بڑھو  پر غور کریں کہ کس وقت کہا گیا۔ بائبل اِس لفظ کو اُس  زمانے سے منسوب کرتی ہے جبکہ دنیا میں صرف  دو انسان  تھے۔ کیا  ایسے وقت میں جبکہ زمین  بالکل غیر آباد تھی یہہ برکت زیبا  نہ تھی اور کیا اب ساری زمین آباد  ہو چکی ہے جو مخالف  طعن سے یوں  کہہ رہا ہے۔  یوروپ  صدیوں سے اُٹھ اُٹھ کر امریکہ اور آسٹریلیا و جا رہا ہے اب دنیا کو بڑہا رہا ہے  مگر اُسکی راہیں ہماری  راہوں سے بعید ہیں۔ یوں نہ کہو کہ افلاس کے مارے اپنا ملک چھوڑ  چھوڑ کر چلے جا رہے ہیں  شاید اُسنے اِس افلاس میں یہہ  بھید رکھا ہو کہ آسٹریلیا اور امریکہ  کے غیر آباد خطوں کو یوروپ کے غریب  مسیحیونسے آباد کرے تاکہ وہ مسیحیت کو ساتھ لیکر جائیں اور جا کر وہاں بسیں جہاں  بڑھنے اور پھلنے کو ہنوز جگہ ہی آدمی کون ہو جو اُسکے کام میں دست اندازی کر سکے خدا مثل برتن بنانے  والے کے اور آدمی  مانند برتن کو بنادیگا  خدا  انگور  لگا نیوالا  اور آدمی انگور اگر وہ اُسکو شاخوں کی طرح کاٹتا چھانٹتا ہے تو وہ یہہ بھی جانتا ہے کہ آئندہ پھل میں کس قدر قدر ترقی ہوگی۔ اور اگر کو ئی  اُسکے کاٹنے چھانٹنے  میں مزاحمت کرے تو پہلے براہ مہربانی یہہ ثابت کر دے کہ کسقدر نیکوں کے پھل لاکر اُس نے اِس مزاحمت کا استحقاق پیدا کیا ہے۔  باشندگان اضلاع  متحدہ میں سے ہزاروں  اسی غریبی کے مارے اپنے وطن سے نکلے تھے جو اب ہر علم اور سبُز میں اور اقبالمندی میں اپنے پرُانے ہموطنوں سے ایکقدم پیچھے نہیں ۔ خدا جو کچھ کرتا ہے ہماری بہتری اور بھلائی  کے لئے کرتا ہے۔ پھر دوسرا طعن  مخالف کا دعا پر ہے کہ عیسائی دعا کرتے ہیں  اور اُنکی دعائیں قبول نہیں  ہوتیں۔ مصنف رسالے کا یہہ کہنا بجا ہے کیونکہ نہ اُنہوں نے کبھی دعا مانگنے کی تکلیف  اُٹھائی اور نہ کبھی مستجاب الدعوات کی بخشش کا تجربہ کیا پر ہر ایک سچا عیسائی  کہہ سکتا ہے کہ بیشک خدا دعاؤں کا سننیوالا خدا ہے۔ اگر دیندارونکی اُن دعاؤنکو جو قبول ہو چکیُں کا غذ پر لکھیں تو ممکن ہو کہ جلد پر جلد تیار ہو لیکن اتنا میں بھی کہتا ہوں کہ اگر دعا بد و ضعی سے مانگی جائے تو وہ ہر گز  قبول نہوگی۔  مانگنا۔ ڈھونڈنا۔ کھٹکھتانا۔ تب ہی بامر اد ہوگا جبکہ اسکی اُمید یہہ ہو کہ مونگینوالا خدا کا جلال ظاہر کر سکے اور ہمیشہ اُسکے ساتھ خوشحال  رہے کہ وہ مسیح کو تہِ دل سے پیار کر سکے اور اپنے بھائیونکو اپنی طرح ۔ کہ وہ بہرحال خدا کے کلام میں مگن رہے خواہ وہ ھالت تکلیف کی ہو یا آرام کی چاہے دولتمندی کی ہو یا افلاس کی اور اگر دعا خدا کی مرضی  پر تجاوز کرے اُسکی قبولیت میں کمال شک ہے اور  نہ کوئی دیندار  کبھی ایسی دعا کرتا ہے کہ اے خدا گو یہہ تیری ہی مرضی ہے کہ میں مفلسی کے دُکھ سہوں تو بھی میں یہہ چاہتا ہوں کہ مجھکو بار  افلاس  سے سبکدوش  کر کے مالدار اور غنی بناوے اور اگر  کوئی  ایسی  دعا کرتا ہے تو وہ عبث مغز خالی کرتا ہے کیونکہ  یہہ دعا ہر گز سُنی نجائیگی۔ مجھے کامل یقین ہے کہ تمام دیندار  پلپٹ پر سے دعا مانگنے والے خواہ انگلستانمیں  ہوں یا امریکہ میں خواہ یوروپ مین ہون یا افریقہ میں اگر انسانیت کے لحاظ سے اور کمزوری کے سبب سے چند روزہ  رنج  و عنا  سے بچنے کی دعا مانگتے بھی ہوں تاہم یہہ بھی ساتھ ہی اپنے  خداوند کسیطرح ضرور کہتے ہونگے ــ باپ میرے میری مرضینہیں پر تیری مرضی ہو۔ مانگینوالا بچہ کیا جانتا ہے کہ چھرُی  کٹاری میرے لئے مفید ہے یا مضر پر باپ جانتا ہے کہ مچھلی دوں یا سانپ۔ پھر متعرض  پولٹیکل  اکانومی اور بائبل شریف میں اختلاف  دکھلاتا ہے جو بالکل غلط ہے۔ بائبل کسی سائینس یا علم کی مخالفت نہیں کرتی  پر ہم بائبل  کے بھیدونکو کس علم  کی امداد  و زریعہ سے کماحقہ دریافت نہٰیں  کر سکتے تاوقیکہ بائبل  کی مدد نہ لیں۔ اِس اعتراض کے جواب سے پہلے ہم اِس  بات پر غور کر لین کہ احکام ربانی کی پیروی  سے ہمارا  فائیدہ ہے یا خدا کا مثلاً جب ہمیں شراب خوری سے ممانعت کی  جاتی ہے اِسمیں  ہمارا فائیدہ ہے یا خدا کا۔ ہر  کس و ناکس  اس سے خوب واقف ہو کہ استعمال مسکران سے کیا نتایج برآمد  ہوتے ہیں تو خون نکرنا ’’ تو چوری نہ کرنا‘‘ وغیرہ تمام احکام ایسے ہیں جو سراسر صرف بہبودی کے لئے ہیں۔ جسکو میں خدا کہتا ہوں وہ ایسا خدا ہے کہ جسکے جلال اور بزرگی میں میرے نیک چلن سے ایک  رتی بھر ترقی نہیں ہوتی اور نہ میرے بدچلن سے اُسکی عظمت میں یک سرِسو فرق آتا ہے کیونکہ اُسکی  قدرت اور جلال ازل سے ابد تک ہمیشہ یکساں ہیں  کمال شکر ہو ترا اے باپ کہ تو میرے فائیدے اور آرام کو اپنا جلال سمجھے اب ہم اِس سلسلہ میں اعتراض کی مدافعت یعنے اختلاف کی مدافعت کیا چاہتے ہیں خدا نے جو یہہ حکم دیا  کہ ’’تو زنا نہ کرنا‘‘ اِسکے عدول  کرنے میں کیا قباحتیں متصور ہو سکتی ہیں؟ بے شمار مثلاً اِس فعل بد کے تکرار سے ٹوٹ  زائل ہوجاتی ہے طرح طرح کی بیماریاں لاحق ہوجاتی ہیں۔ اور بہت سے نقصان پیدا ہوتے ہیں ازاں جملہ میں ایک یہہ بھی سمجھتا  ہوں کہاگر یہہ حکم نہوتا تو ضرور آبادی  حد سے زیادہ ہوجاتی بیشک خدا نے ہمارے  ہی فائیدہ  کو مدنظر رکھکر یہہ حکم دیا کہ مبادا آبادی کی کثرت انداز سے بڑھ جائے یقیناً اگر یہہ زنجیر  تیار کیجاتی اور اگر یہہ سرپوش تجویز نہوتی تو دنیا اُبل اُبل  پڑتی۔ اِسدنیا میں ہزاروں  آدمی ایسے  موجود ہیں جو اسی لگام سے جکڑے جکڑے ہیں اور پھر خدا نے صرف اس حکم پر اکتفا نکیا  بلکہ اُسنے یہہ حکم بھی دیا کہ ایک جورو سے زیادہ جورواں  نکرو۔ کون کہتا ہے کہ پولٹیکل  اکانومی اور بائبل میں اختلاف  ہے غور کرو کہ ابتدائے عالم سے کیسی  مطابقت  بائیبل  اور پولٹیکل  اکانومی میں چلی آئی ہے کہ جب دنیا میں لوگ بہت بہت جوروآں کرتے تھے اور خدا برداشت کرتا تھا اور یوں آبادی زیادہ ہوگی۔ بنی اسرائیل کا نمونہ اور قوموں نے لیا پھر آخر اُس  نے یہہ مستقیم ارادہ  ظاہر کیا کہ تیرا مددگار ایک ہی ہے بس  ہے اس سے زیادہ  نہو۔ کیا ان باتونسے  یہہ ظاہر ہوتا ہے کہ بائبل  پولٹیکل اکانومی سے مطابقت نہیں رکھتی اگر اسکو مطابقت  نہیں کہتے تو میں نہیں جانتا کہ مطابقت  کس چیز کا نام ہے۔ خدا نے ہمارے فائدے کے لئے سب کچھ کر دیا اب اگر بنی آدم  اپنی شہواتی عادات کو بس  میں نہ رکھے تو خدا کا کیا قصور

؎  گر نہ بیندبروز شپرہ چشم
چشمۂ آفتاب راچہ گناہ

اب کوئی چودہ جورواں کرے یا چار اُسکی مرضی۔ کوئی زنا کرے یا بدکاری اُسکی رضا۔ پر اگر لوگ خدا کے حکم کے بموجب  پرہیزگاری اور صبر سے چلیں تو پھر دیکھیں کہ کسطرح آبادی اِسقدر پھیل جائے جو لاگ بھوکوں مریں۔ بس اے عزیز خداوند کا شکر کرتے ہوئے ٹھراتے ہوئے اپنی نجات کا کام کرتے جاؤ۔

راقم طالب الدین از لاہور

ایک اعتراض کا جواب

A Reply to an Objection

Published in Nur-i-Afshan October 31, 1889
By Rev. Nasir

عموماً مسیحی مذہب کے خلاف یہہ اعتراض پیش کیا جاتا ہے کہ چونکہ مسیح گناہونگا کفارہ ہوا۔ اِس لئے مسیحیوں کو گناہ کرنے کی اجازت مل گئی ہے۔ یا  یوں کہیں کہ مسیحی جسقدر گناہ سے  چاہ  کریں مسیح کے کفارہ کے سبب بخشے جائینگے۔ ایسے معترض بیبل کے اُصول  سے ناواقف ہونے کے باعث  غلطی کرتے ہیں واضح  ہو کہ کو ئی  اعتراض مسیحی مذہب کے خلاف  نیا نہیں۔ ابتدائے تواریخ  میں مخالفوں نے وہ وہ سخت اعتراض کئے ہیں کہ آج  کل کے بڑے بڑے  نکتہ چینوں کے خیال میں بھی نہیں  آئے۔ اُس پر بھی اِس  زمانہ کے بعض کوتاوبیں پرُانے مرُدے اُکھاڑنے اور اُنکو نئے لباس پیش کرنے پر اکڑتے ہیں  مسیحی  مذہب کے خلاف چند  سُنے سُنائے اعتراض کر کے جھُلا کے سامنے  اپنی  لیاقت کا نقارہ بجاتے ہیں ۔  مذکورہ  بالا اعتراض  بھی اُنہی قدیم اعتراضوں  میں سے ہے۔ چنانچہ پولوس حواری  شہر روماؔ  کے مسیحیوں کی طرف کی طرف  خط  میں بھی سوال دوسرے  الفاظ  میں یوں ادا کرتا ہے کہ کیا  ہم گناہ  کیا کریں  اِس لئے کہ ہم  شریعت کے اختیار میں نہین بلکہ فضل  کے اختیار  میں ہیں۔  اور اِس اعتراض  کا جواب بھی رسول مذکور نے اُسی باب میں تحریر  کیا ہے۔ جو چاہے  رومیوں  کے نام خط کا چھٹا باب غور  سے پڑھ کر دیکھے۔

اِس اعتراض سے یہہ ثابت ہوتا ہے کہ معترض خود  نہیں سمجھتا کہ کیا اعتراض کر رہا ہے  کیونکہ جو شخص  گناہ کی نجاست سے ناواقف  اور گناہونکی مغفرت  کی نسبت انتظام  ایزدی کا علم نہیں رکھتا وہی اِس قسم کے کلمات زبان پر لاویگا۔  شاید بیجا نہ ہوگا  کہ ایسوں کی خاطر  یہاں چند  الفاظ اُس تعلق کی نسبت لکھے  جاویں جو  مسیحی کا مسیح کے ساتھ  ہوتا ہے۔ لیکن یاد رہے کہ یہہ معاملات  روحانی  عالم سے متعلق ہیں  اور اُن لوگون کی سمجھ میں ہر گز نہیں  آسکتے جو دیدنی اشیاء کے حلقہ کے باہر نگاہ نہیں  دوڑ سکتے  ایسوں کے سامنے روحانی  عالم کی باتیں بیوقوفیاں  ہیں۔

دُنیا میں ہر ایک  اِس  اُصول  کو تسلیم کریگا کہ اچھا  درخت برُے پھل نہین لا سکتا اور نہ بُرا درخت  اچھے پھل لا سکتا ہے یا دوسرے الفاظ  میں  اگر  سر مین ضعیف ہو تو سارا جسم ضعیف ہوگا اِس خیال کو مدنظر  رکھکر  ذرا آگے چلیں ۔ جب آدم اول جو تمام خلقت کا سر تھا خدا کی نافرمانی سے گنہگار  ٹھہر ا تو اُسکے باعث اُسکی نسل اور اُسکے تمام متعلقین پر ایک قسم  کا ضعف طاری ہو گیا۔ زمین آدم کے سبب ملعون  ہو گئی۔ بنی آدم  کا بگاڑ دیکھنے کے لئے  بہت غور  و فکر  کی ضرورت  نہیں یہہ اظہر من الشمس ہے۔ اگر یہہ ممکن ہو کہ  ہم  آدم اوّل سے تعلق  رکھ کر گنہگار ٹھہرے  تو کیا یہہ ناممکن ہے کہ کسی ایسے آدم ثانی  سے متعلق ہو کر جو کامل راستباز ہو ہم راست باز ٹھہریں۔ کیا ناممکن ہے کہ ’’ غرض جَیسا ایک گناہ کے سبب سے وہ فَیصلہ ہُؤا جِس کا نتِیجہ سب آدمِیوں کی سزا کا حُکم تھا وَیسا ہی راست بازی کے ایک کام کے وسِیلہ سے سب آدمِیوں کو وہ نِعمت مِلی جِس سے راست باز ٹھہر کر زِندگی پائیں۔ کیونکہ جِس طرح ایک ہی شخص کی نافرمانی سے بُہت سے لوگ گُنہگار ٹھہرے اُسی طرح ایک کی فرمانبرداری سے بُہت سے لوگ راست باز ٹھہریں گے۔‘‘ ( رومیوں ۵: ۱۸، ۱۹)

جیسا کہ جسمانی عالم میں پیدایش ہے ویسا ہی روحانی  عالم میں بھی ہے۔ جسکو روح القدس  سے سر ِ نو پیدا ہونا کہا گیا ہے جیسا بچہ کا پیدا ہونا کو ئی علم طب کا مسئلہ  نہین بلکہ ایک امر واقعی  ہے۔ ویسا ہی سر نو پیدا ہونا بھی کو ئی علم الہیٰ کا مسئلہ  یا بحث طلب  امر نہیں ہے۔ اِس نو پیدایش سے اِنسان ایک  ایسے بدن کا عضو بن جاتا ہے جس  کا سر مسیح  ہے۔ زندگی کی حرکات اُس میں نمایاں ہوتی ہیں۔  اِس تعلق کو  ہمارے خداوند نے دوسرے  الفاظ  میں انگور کی مثال  سے ادا کیا۔ چنانچہ وہ فرماتا ہے کہ ’’ مَیں انگُور کا درخت ہُوں تُم ڈالِیاں ہو ۔ جو مُجھ میں قائِم رہتا ہے اور مَیں اُس میں وُہی بُہت پَھل لاتا ہے کیونکہ مُجھ سے جُدا ہو کر تُم کُچھ نہیں کر سکتے‘‘۔ غرض  اِنسان مسیح میں  پیوند ہو کر  نئی زندگی حاصل کرتا ہے۔ وہی اس  جو جڑ مین ہے شاخ میں بھی دوران  کرتا ہے۔ اور پھر جیسا کہ شاخ کو میوہ لانے کے لئے کسی قسم کی کوشش  نہیں  کرنی پڑتی بلکہ درخت میں قائم  رہنا ہی شرط ہے۔ ویسا ہی اِنسان  اپنی مرضی کو خدا کی مرضی کے تابع کر کے اور  ایمان سے اُس میں قائم رہکر بہت پھل لاتا ہے۔ پر پھل  وہی ہیں  جنکو  عموماً  نیکیاں  کہتے ہیں۔ اور جنکو پولوس رسول روح کا پھل کہتا ہے۔ چنانچہ  وہ فرماتا ہے کہ ’’روح کا پھل  جو  ہے سو محبتؔ خوؔشی سلامتیؔ  صبر ؔ  خیر ؔ خواہی  نیکی ؔ  ایمانداری ؔ فروتنی  پرہیزگاریؔ ہے۔ ‘‘

حاصل کلام  جوں جوں اِنسان مسیح میں شامل ہوتا جاتا ہے اُسیقدر  اُسکی خواہش  یا خوشی  گناہ میں  نہیں ہو تی۔ مسیح نے نہ فقط  ہمارے گزشتہ گناہونکی  معافی کے لئے کفارہ دیا  ہے بلکہ جو شخص اِیمان کے زریعہ  اپنے تئیں اُسکے تابع  کر دیتا ہے  آیندہ کے لئے گناہ کے اختیار  سے بھی رہائی پاتا ہے۔ چنانچہ لکھا ہے کہ ’’ تم گناہ سے چھوٹکر  راستباز ی  کے غُلام بنے۔‘‘ تم آپ کو گناہ کی نسبت مُردہ پر خدا کی نسبت ہمارے خداوند  یسوع مسیح کے وسیلہ زندہ سمجھو۔‘‘  ’’اور کہ گناہ تمھارے  فانی جسم پر سلطنت نہ کرے۔‘‘  اب اِس صداقت کے سامنے وہ اعتراض کہاں رہا۔ اِس عجیب روشنی کے سامنے  اُسکی  پیچیدگی حل ہو گئی۔

اے ناظریں یہہ مبارک تجربہ میرے اور تمھارے لئے ہے اور خدا اپنی برکتیں  مفت دیتا ہے۔ دیکھو اب قبولیت کا وقت ہے دیکھو اب نجات کا دن ہے۔

راقم ۔۔۔ ناصر  از لاہور

خود غرضی

علامہ کدرناتھ

Selfishness

Published in Nur-i-Afshan December 19, 1889
By Rev. Kidarnath

عزیز دوستو!یہہ ایک عام قاعدہ ہے کہ خود غرضی انسان کو حق و باطل میں تمیز نہیں کرنے دیتی اور یہہ خود غرضی  دو قسم کی ہے۔ ایک دُنیاوی ۔ دوسری دینی۔

اوّل  جھوٹے مقدّمات بنانا جعل سازی کرنا و  دغا بازی  سے کسی کا مال ہضم کر لینا جھوٹی قسمیں کھانا حاکم  ہو کر کسی فریق کے لحاظ یا اپنے عہدہ کو قایم رکھنے کی غرض سے حق کو  ناحق  کر ڈالنا  وغیرہ۔ چنانچہ  پنطوس پلاطوس حاکم  کی خود غرضی اسی قسم کی تھی۔ دویم اپنی یا اپنے پیشوا  کی تعلیم کی بطالت نقلاً اور عقلاً ظاہر ہوجانے یا کسی خاص  تعلیم کی بناوٹ اور اپنے خیال  کی خامی معلوم  ہو جانے پر بھی  اکثر بڑے بڑے  سر گرم غیر تمندان مذہب کا سچّی  با ت  کو جھٹلانا  یا جھوٹی  بات کو سچ بنانا اور حقیقی ہادی کی جان تک کے خواہاں  ہوجانا۔ جیسے کہ آجکل ہندو محمّدی  اور سوائے اُنکے اور فریق  بھی اسی دینی خود غرضی میں شامل ہیں۔ لیکن اِن کو چھوڑ  کر اُس قوم پر لحاظ  کریں جو خدا کی قوم  ہے اور جو ابتدا سے مسیح کی تشریف آوری  تک خدا  کے عجیب انتظاموں کے وسیلہ پاک کلام کی امانتدار رہکر  مسیح سے پیشتر مسیح کی منادی  اور  تھی  اور شب و روز اُسکے ظہور کی انتظاری کرتی تھی۔ مگر تو بھی  یا انسانی کمزوری یا بار بار مصیبتیں جھیلنے  یا رومی حکومت  سے تنگ  آکر اپنے  ربیوں کی غلط فہمی سے خداوند  مسیح کی دنیوی  شان و شوکت  سے قبول کرنے پر تّیار ہورہی  تھی۔ اسی خود غرضی نے اُنکو منزل مقصود تک نہ پہنچنے  دی بلکہ اپنے ہی رہانندہ اور آرام دہندہ کو ایسے سخت عذاب سے مصلوب کرایا کہ اگر اُنہوں نے توبہ نکی ہو اور اُسی مصلوب پر ایمان نہ لائے ہوں تو سب سے پہلے وہی جنّہم کے وارث  ہونگے۔

چنانچہ آیات زیل پر غور  کرنے سے ہماری  دونوں تقسیموں کی صداقت ظاہر ہوتی ہے۔

انجیل یوحناّ ۱۹۔ باب ۱۵، ۱۶ ویں آیات ۔

پر وہ چلاّئے کہ لیجا لیجا اُسے صلیب دے۔ پلاطوس نے کہا ۔ کیا تمہا رے  بادشاہ کو صلیب  دوں؟  ۔ سردار کاہنوں نے جواب دیا کہ قیصر  کے سوا ہمارا کو ئی بادشاہ نہیں ہے۔

اِس پندرہویں آیت میں تین جملہ ہیں۔

پہلے میں یہودیوں کا جواب ۔ دوسرے  میں پلاطوس کا سوال۔ تیسرے  میں سردار کاہنوں  کا جواب۔

مگر پہلے جملہ میں یہودیوں کا جواب کسی سوال کو چاہتا ہے وہ چودھویں آیت میں موجود ہے۔ کہ دیکھو اپنا بادشاہ اب مطلب کھلُ گیا کہ پلاطوس نے یہودیوں سے کہا کہ دیکھو ؔ  اپنابادشاہ۔ غیر قوم بُت پرست حاکم تو مسیح کو  یہودیوں کا بادشاہ بناتا ہے جیسا کہ اُسنے کتابہ پر  بھی لکھا تھا اور اُسکے بدلنے میں یہودیوں کا کہا نمانا  مگر جو اپنے کو خدا کا برگزیدہ جانیں وہ خدا کے بیٹے کو رَد کر کے بت پرست قیصر کو اپنا بادشاہ  مانیں یہہ کیسی دینداری ہے ۔

تب یہودیون نے  جوابدیا  کہ لیجا لیجاؔ اُسے صلیب دے لیکن پلاطوس  مکرر پوچھتا ہے کہ کیا تمہارے بادشاہ کو صلیب دوں یہہ تکرار اچھے موقع پر واقع ہوئے تاکہ یہودیوں کو مسیح کی بادشاہت کو رَد کرنے میں کو ئی عزر باقی نہ رئے۔

یہاں ایک سوال پیدا ہوتا ہے کہ پلاطوس نے مسیح کو کیوں بادشاہ کہا۔

اِسکے دو جواب ہیں۔

اول خدا کا ارادہ تھا کہ اپنے بیٹے کی بادشاہت کی منادی غیر قوم  بیدین  حاکم سے کرائے اور جھوٹے ریاکار  یہودیوں  کو شرمندگی حاصل ہو۔

لوقا کے ۲۳ باب کی ۲۔ آیت سے معلوم ہوتا  ہے کہ یہودیوں نے آپ پلاطوس کے حضور اور جھوٹے الزام لگاتے ہوئے یہہ بھی کہا تھا کہ وہ اپنے تئیں  مسیح بادشاہ کہتا ہے اور یہی یوحناّ  ۱۹ ۔ ۱۲ میں بھی ہے۔ اگرچہ یہودیوں کو عہد عتیق  میں بار بار مطالعہ کرنے سے خوب معلوم تھا کہ مسیح بادشاہ  ہے اور کہ اُسکی بادشاہت ابدی ہے۔ دیکھو زبور ۴۵۔ ا۔ اور یسعیاہ  ۲۳۔ ۱ ۔ یرمیاہ۔ ۴۳۔ ۵۔ وغیرہ۔

 تو بھی اُنکی خود غرضی اور اُنکے ربیوں کی غلط فہمی نے اُنہیں یہانتک  بیوقوف  بنا دیا کہ مسیح کی روحانی بادشاہت کو دنُیوی سلطنت سے بدل ڈالا۔

حالانکہ خداوند نے  یوحناّ ۶۔ ۱۵ کے مطابق  اُنہیں اس غلطی سے محفوظ رکھنا چاہا اور صاف فرمایا کہ میری بادشاہت اِس جہان کی نہیں  یوحنا ّ  ۱۹۔ ۳۶۔ لیکن پھر بھی وہ اپنی غلطی سے باز نہ  آئے اور سردار  کاہنوں نے صاف  کہا کہ قیصر کے سوا  ہمارا کو ئی بادشاہ نہیں۔ پیدایش ۴۹۔ ۱۰  کہ مطابق یہہ سچ بھی ہے۔ کیونکہ سیلا اُگیا اور یہودا سے ریاست کا عصا جاتا رہا  در حقیقت اُسوقت یہودی بادشاہ نہ تھا بلکہ رومی لیکن  عام خیال میں پروردگاری  اور خالقّیت کے لحاظ  سے خدا  تو اُنکا نہ صرف  بادشاہ  بلکہ بادشاہوں کا بادشاہ  موجود تھا اگرچہ  ۱سموئیل ۱۔  ۵ ، ۷ ، ۱۲ کے موافق اُنکے باپ دادوں نے خدا کے بدلے ساؤل  کو بادشاہ بنایا تو بھی ایسا انکار محض  جہالت اور بیدینی  ہے۔

واضع ہو کہ مسیح کی یہہ تعلیم نہیں ہے کہ اپنے  بادشاہ وقت سے بغاوت کر و بلکہ صاف  فرمایا کہ  جو چیز یں  قیصر  کی ہیں قیصر کو  اور جو خدا  کی ہیں خدا کو دو متی ۲۲ ۔ ۲۱۔ معلوم ہوتا ہے کہ یہودی اسی تعلیم سے اور بھی  زیادہ  جل گئے تھے کیونکہ وہ ہر وقت رومی حکومت سے ناراض رہتےتھے آخر کار جس سے باغی رہتے  تھے اُسی قیصر کو اپنا  بادشاہ بنا لیا اور سوائے کا لفظ  بولنے سے خدا کی بادشاہت کے منُکر ہوگئے ۔ یہہ گویا پرائی بدشگونی  کیواسطے اپنی ہی ناک کاٹ لی۔

 پھر آئت ہذا کے تیسرے جملہ میں سردار کوہنوں کے جواب دینے سے پایا جاتا ہے کہ جسطرح خدا نے موسیٰ کی معرفت  احبار کے ۱۔ ۵ میں فرمایا  ہے کہ کاہن جو بنی  ہارون ہیں لہو لاویں۔ اُسی  طرح اِس حقیقی برّہ کے خون  ہیں۔ ( جو جہاں کا گناہ اُٹھا  لیجاتا ہے) سردار کوہنوں  کے ہاتھ رنگے ہوئے نظر آتے ہیں۔ اور یون خدا کا ارادہ  پورا ہوا اور چابت کر دیا کہ سب اگلی قربانیاں اس حقیقی قربانی کی  نشانیاں تھیں اِس آئت میں صلیب  کا لفظ  جو  واقع  ہوا ہے مناسب معلوم ہوتا ہے کہ اُسکی نسبت بھی کچھ  بیان کریں۔

یاد رکھنا  چاہئے کہ مسطیر لکڑی  کے اُپری سرے پر دوسری چھوٹی  مسطیر آڑی لکڑی  لگی ہوئی تھی اگر ہم اپنے دونوں  ہاتھ دہنے بائیں  پھیلائیں  تو  صلیب کی شکل  معلوم ہو گی اِس سے ثابت ہوتا ہے کہ مسیح کی صلیب  کو آدم زاد سے نیچرل  طور پر بھی کہانتک مناسبت ہے۔ خیر۔  اُس لکڑی کو زمین پر ڈالکر مجرم  کے دونوں ہاتھوں  کو پھیلا کر ہتھیلیوں  میں اور دونون پاؤں میں کیلیں ٹھونکدیتے  تھے پھر جھٹکا دیکر اُٹھاتے اور گاڑدیتے  تھے اِس جھٹکے سے مصلوب  کو سخت تکلیف ہوتی تھی اور تڑپ تڑپ  کر مشکل سے جان نکلتی تھی اور جلد جان نکلنے کی غرض  سے کبھی کبھی ہڈّیاں  بھی توڑی جاتی تھیں۔ مگر ہمارے مصلوب منُجی کی نہیں کیونکہ داؤد  نبی الہام سے فرما چکا تھا۔ کہ وہ اُسکی ساری ہڈیوں کا نگہبان  ہے  اُنمیں سے ایک بھی ٹوٹنے  نہیں پاتی۔ زبور ۳۴ ۔ ۲۰۔ اور یہہ اُس حُکم کی مطابقت ہوا جو خروج ۱۲ ۔ ۴۶ میں ہے اور نہ اُسکی  ہڈی توڑی جاوے۔ المختصر یہہ سخت بیرحمی  کی وحشیانہ سزا حقارتاً رومی جو طالم و ستم میں اپنی مانند آپ تھے جنگ سے بھاگے ہوؤں  اور غلاموں  وغیرہ  کو دیتے تھے۔  افسوس  کہ ہمارے خداوند یسوع  ناصری کو یہی سزا اُٹھانی پڑی نہ اپنے لئے بلکہ ہمارے لئے دیکھو یسعیاہ ۵۳۔ ۵۔

یہاں ایک سوال  پیدا ہوتا ہے کہ یہودیوں نے صلیب دئے جانیکی  درخواست کیون کی اور آپ ہی مدُعّی ہو کر  حاکمانہ  فیصلہ کیوں کر لیا۔

ہمارے پاس اسکے دو جواب ہیں۔

اوّل خدا کے ارادہ میں مسیح کیواسطے صلیب مقرر ہو چُکی تھی دیکھو ۲۲ زبور کی ۱۶  ویں آئت  میں داؤد نبی الہام سے فرماتا  ہے کہ وہ میرے ہاتھ اور میرے پاؤں چھیدتے پھر  پولوس رسول کا  خط  گلتیوں  کو ۳ ۔ ۱۳ سے واضع ہوتا ہے کہ استثنا ۲۱ ۔ ۲۳ میں جو حکم  ہے کہ وہ جو پھانسی دیا جاتا ہے خدا کا ملعون  ہے۔ یہہ مسیح کے حق میں پیشین گوئی تھی پھر مسیح نے آپ  بھی فرمایا تھا کہ میں  صلیبی  موت سے مرونگا دیکھو  متی ۲۶۔ ۲ ابن آدم حوالہ  کیا  جائیگا کہ صلیب  پر کھینچا  جاوے۔ مگر یہودیوں  نے فعل مختاری سے یہہ جانکر کہ ہم مسیھ کو حقیر بناویں۔ کیونکہ اُن دنوں  صلیبی  موت عموماً حقیر گنی جاتی تھی شرارت اور بیدینی  سے خدا کے ارادہ کو پارا کیا اور سزا کے مستحق  ہوئے  اور یہہ بھی ہمارے خداوند کی  پست  حالی  پیدایش سے موت تک  چابت ہو۔ دیکھو جب وہ پیدا  ہوا  تو چرنی میں رکھا گیا  لوقا  ۲۔ ۷۔ اور موُا تو صلیبی موت موا۔

دوم خداوند کے مقدمہ سے ظاہر ہے کہ پلاطوس  عدالت عدالت نہ تھی بلکہ اندھیر نگری چوپٹ  راج۔ کیونکہ اِس مقدّمہ کی بنیاد سے انتہا  تک غلط  اور محض یہودیوں  کی جنبہ داری  بات بات میں ظاہر  ہوتی ہے ۔ پہلے الزام  نامعقول  ۔ کہ اگر یہہ بدکار  نہوتا  تو ہم تیرے حوالہ  نکرتے ۔ یوحناّ  ۱۸۔ ۳۰۔

دوسرے گواہ  جھوٹے کہ اسنے کہا کہ میں ہیکل کو ڈھا  دونگا۔ متی ۲۶۔ ۶۱ حالانکہ  مسیح نے کہا تھا کہ  تم ڈھا دو ۔ یوحناّ ۲۔ ۱۹۔

تیسرے  بیجری ثابت  ہونے پر بھی پلاطوس نے مسیح  کو نہیں چھوڑا۔ یوحناّ ۱۹۔ ۱۵۔

 الغرض خود غرضی  کی گھنگھورگھٹا چھا رہی تھی اور اُنکے دلوں میں شرارت کا اندھیرا گھپ تھا۔  اُسوقت  اُنکی  تمیز بھی اندھی ہو رہی تھی پس ہمارے نزدیک کچھ بعید نہین کہ یہودیوں نے کہا۔ لیجا یجا اُسے صلیب دے۔ تب ؔ اُسنے اُسے  اُنکے حوالہ کیا کہ مصلوب  ہو۔ اور وہ یسوع  کو پکڑ  لیگئے۔ یوحناّ  ۱۹۔ ۱۶۔ اسی باب کی ۱۴ویں  آیت میں لکھا ہے کہ چھٹی گھڑی کے قریب  تھا یعنی انگریزی حساب  کے موافق صبح کے۶ بجے تھے یہہ بات  بھی قابل لحاظ  ہے کہ جب تمام  جہان میں روشنی کا عالم تھا تب  پلاطوس  کے عدالتی  دالان میں تاریکی  کا دور دورہ ہو رہا تھا۔ اگر چہ آفتاب  صداقت آپ اُنکے روبرو تھا لیکن  اُن شّپرہ چشموں  کی دِلی  رتاریکی  میں  سورج گہن  سے زیادہ اندھیرا  تھا۔  اُسی وقت پلاطوس نے مسیح  کو یہودیوں  کے حوالہ  کیا گویا خدا کے برّہ  کو شیطانی  بھیڑیوں  کے منُہ کا نوالہ کیا۔  دیکھو خود غرضی  بھی کیسی بُری بلا ہے جو آدمی کو اپنا فرض  منصبی سچاّئی  سے ادا نہیں  کرنے دیتی  تمام عدالتوں  میں مدُعاّ  علیہ  پولیس کے حوالہ ہوتا ہے۔ یہاں مدُعاّ علیہ پولیس  کے حوالہ ہوتا ہے۔ یہاں مدُعاّ علیہ  مدعیوں  کی حوالات می کیا  گیا۔

پھر اِس حوالگی سے لوقا ۲۳ ۔ ۱۷ کے بموجب کیا  کوئی  تنبیہ منظور تھی ۔ نہیں ۔ بلکہ لوقا ۲۳۔ ۲۴ موافق  یہودیوں کی خواہش  کے موافق مصلوب ہونیکو۔ 

اور وہ یسوع کو پکڑ کر لیگئے۔

 اورانواع وا قسام کی زلّت  و حقارت کے ساتھ اپسے مصلوب  کیا۔ جیسا کہ اگلی  ۱۷ ،  ۱۸ وغیرہ  آئیتوں  میں مندرج  ہے۔ اوریوں  ہمپر  کھلا کہ توریت زبور انبیا کے صحیفوں  اور انجیل کا خلاصہ یہہ ہے کہ  مسیح ہمارے گناہوں  کے واسطے  ہوُا  اور گاڑا گیا اور تیسرے دن کتابوں کے موافق جی اُٹھا  اور شریروں کی شرارت سے خدا نے ایمانداروں  کیواسطے  نیکی نکال لی۔

حاصل کلام

اِس تمام بیان سے ہمکو  چند نصیحتیں ملتی ہیں ۔

اولؔ  گناہ سخت جرم ہے۔ جسکی سزا اِنسانی برداشت سے باہر ہے۔

دومؔ خدا باپ کی محبت کہ اُسنے جہان کو ایسا پیار  کیا کہ اپنے فرزند عزیز کو اِس  حقیر موت کیواسطے بخشدیا۔

سومؔ خدا کے بیٹے  کا پیار کہ اُسنے گنہگاروں  کی محبت میں خدا ہو کے  خدا کی برابر  ہونا  غنیمت  نہ سمجھا  بلکہ آپ کو یہانتک حقیر بنایا کہ صلیبی موت  کی تکلیفوں  کو بلاتّکلف  گوارا  کر کے ہمکو ہاں خاص مجھکو لعنت سے بچایا۔

چہارؔم  ہمپر  فرض ہے کہ مسیح  سے محّبت رکھیں کیونکہ پہلے اُسنے ہم سے محبت رکھی  بنی اسرائیل  کی  موافق نہ بنیں کہ جنکے واسطے  خاص  مسیح آیا  پر اُنہوں نے اُسےّ عداوت کر کے اُسنے مصلوب کیا۔ اور نہ بنی اسمٰعیل کی صورت  جو آجتک  اُس مصلوب  غمزدہ  کو ٹھٹھوں میں اوڑاتے ہیں اور عربی نبی کی محبت  میں خدا کے بیٹے پر ایمان نہیں لاتے۔

پنؔجم  کسی کام کو جو ہمارے واسطے منع ہے یہہ  سمجھ کر  کہ خدا کے ارادہ میں ایسا ہی ہے۔ یا سہوًا  اپنی فعل مختاری  سے پورا نہ کریں  کیونکہ قانون کی عدم فہمی  کے سبب مجرُم  سزا سے نچ نہیں سکتا۔ دیکھو داؤد  بادشاہ نے کیونکر ساؤل پر ہاتھ ڈالنے  سے خود  کو بچایا ۔ ۱ سموئیل  ۲۴۔ ۶، ۲۶۔ ۹،۱۱۔ آخر خدا کا ارادہ  دوسرے  طور پر پورا ہوا۔  ۱ سموئیل ۳۱۔ ۵۔

ششؔم خود غرضی کو پاس نہ آنے دیں خواہ وہ سچ کے پیرایہ میں کیوں  نہو جسطرح  فقیہ  فریسی  دہ یکی  کے پردہ میں بیواؤں کا گھر لوٹتے  تھے اور سبت کے بہانہ خیرات  تک نہ کرتے  تھے اور لمّبی  چوڑی دُعاؤں سے غافل نہوتے  تھے۔ پر خداوند  نے فرمایا کہ وہ  مکاّر ہیں اُنکے خمیر سے چوکس رہو۔

ہفتؔم  ہم جو مسیح مصلوب کی منادی کیواسطے  تیاری کرتے  ہیں۔ اِس مضمون  سے یہہ ضرور  دیکھ لیں کہ ہم پر کیسی  ہی مصُیبتیں ایزائیں تکلیفیں یا زرکا لالچ غیر اقوام  کیطرف  سے کیوں نہ آئیں  وہ ہمیں  ہزار ٹھٹھوں میں اُڑائیں مگر ضرور ہے کہ ہم اِس  بھاری کام کو ختم کر کے دُنیا سے کوچ کرتے وقت اپنے خداوند  کی موافق کہہ سکیں کہ پورا ہوا۔ یوحنّا  ۱۹۔ ۳۰۔ آمین

رقم زدہ۔ کیدارناتھ ۔ جونیر کلاس۔ مدرسہ علم سہارنپور۔ 

اہل فکر پر بائبل کے استحقاق

The Claims of the Bible

Published in Nur-i-Afshan March 16, 1894

بائبل ایک یو نانی لفظ  ہے جس کئ معنے ہیں۔ ( دی ؔبک) الکتاؔب ۔ سکا ٹلنڈ  کے مشہور  ناولسٹ  اور شاعر سرواؔلٹر  سکاٹ  صاحب نے  جب حالت ِ نزع میں تھے اپنے رشتہ دار لاکؔ  ہرٹ سے کہا کہ میرے پاس ( دی بک)  الکتاب لے  آؤ۔ لاک ؔ ہر ٹ  حیران تھا کہ میں کونسی کتاب لیجاؤں ۔ اوراِدہر اُدہر جھانک رہا تھا کہ کیا کروں کہ سر ؔوالٹر  سکاٹ نے پھر کہا کیا دنیا بھر میں کو ئی اور کتاب بھی ہے۔ لاکؔ ہرٹ  اب سمجھ گیا کہ کس  کتاب  سے اُن کی مراد  اور  جھٹ بائبل (دی بک) اُن کے پاس لے گیا۔

واقعی  یہ کتاب  ( دی بک)  الکتاب  ہے۔ دنیا بھر میں سب سے قدیمی ۔ مختلف زمانوں میں مختلف  مزاج ۔ حیثیت ۔ عادات  معلومات کے آدمیوں کے زریعہ لکھی گئی مگر تو بھی ایک ایسی  نادر کتاب کہ باوجوداِن  تمام  تفاوتوں کے روح ِالہٰیکی ہدایت سے اُس میں اول سے آخر تک  ایک عجیب سلسلے ایک غریب رشتہ پایا جاتا ہے کہ جو ؔکچھ اول میں پہلے ہی پہل  ابتدائی  صورت میں لکھا گیا آخر  تک وہی ؔ کچھ ا،س انداز سے اِنتہا تک  پہنچایا گیا کہ صبح کی ابتدائی چمک اور آفتاب  نصف النہار کی دمک کا سما باندہ دکھلایا۔

ہر زمانہ  میں اس کتاب پر بڑی  چھان  بین  جی گئی  ہے اور آج کل اس ملک میں بھی اہل فکر  اس کو پڑھتے ہیں  اِسپر  گفتگو کرتے ۔ غور کرتے۔ کھوجتے ہیں۔

ماہران علم  ادب اِس  کتاب کی انگریزی  لٹر یچر کے مداح  میں اور طالبعلمان زبان انگریزی زبان دانی کے حصول کے لحاظ  سے اِس کتاب  کو عزیز رکھتے ہیں  مگر ہمارا منشا اِس وقت یہہ نہیں ہے کہ اس کتاب کی اس قسم کی خوبیاں  کا اظہار کریں۔ ہم ان سے قطع نظر کر کے ایک اور طرف آپ کی فکر کو متوجہ کرتے ہیں ۔ اور وہ یہہ ہے۔ 

منجملہ دیگر مسائل کے دو نہائت ہی ضروری  مسئلے اِس کتاب مین اول سے آخر تک پیدایش کی کتاب سے لیکر مکاشفات کی کتاب تک بڑی  صفائی  کے ساتھ  پائے جاتے ہیں۔  اور یہہ دونوں ایسے مسایل ہیں  جو کسی دوسری  کتاب میں  جو الہامی ہونے کا دعویٰ  کرتی ہیں اس طور  پر اور اس صفائی کے ساتھ  پا ئے  نہیں جاتے بلکہ یوں  کہیں  کہ بالمقابل  ہیں  ہی نہیں ۔ اور وہ یہہ ہیں۔

اوّل ۔ مسئلہ گناہ۔

دوم ۔نجات  کا طریق الہیٰ۔

یہ کتاب مثل  دیگر کتابوں کی اصلیت اور  کراہیت کو کم کر کے نہیں دکھلاتی  ہے بلکہ صاف صاف بتلاتی ہے کہ گناہ دید و دانستہ  فعل ہے۔ یہ اﷲ تعالیٰ کی صریح  نافرمانی  ہے اور اُس کے احکام کا توڑنا ۔  بائبل میں آدم زاد کے گناہ کانقشہ اس صفائی سے کھینچا گیا ہے ( دیکھو خصوصاً  اِنجیل  متی ۔ کوہی وعظ) کہ جواس کو  صدق دل سے پڑھتا  ہے  اپنے گناہگار دل کا عکس اُس میں پاتا ہے۔

کہتے ہیں کہ ایک مرتبہ ایک پادری صاحب  بائیبل  سے بڑہ کر گناہ کا زکر ایک افریقہ  کے سردار کے روبرو کر رہے تھے۔  سنتے سنتے طیش  میں  آکر وہ سردار بول اُٹھا ۔ تجھکو میری نسبت کس نے  خبر دی  ہے۔ تجھکو میرے حال سے کب  واقفی ہوئی۔ جب ڈاکٹر  ڈف صاحب  کلکتہ میں نوجوانوں  کی ایک جماعت کو بائبل  پڑ ہا  رہے  تھے اور گناہ کا حال بائبل  سے بتا رہے تھے ایک زی عقل سنسکرت  دان تعلیم یافتہ برہمن  نوجوان  حیران ہو کر کہنے لگا۔  اے  صاحب میرے دل کے حال کی نسبت آپ کو کہاں سے خبر لگی یہہ تو ٹھیک  میرے دل کا حال  ہے جو آپ بتا رہے  ہیں۔ غور کا مقام ہے کہ اُس کندانا تراش وحشی سردار  کا ریمارک اور اس مہذب  تعلیم یافتہ برہمن کا قول اس کتاب کی نسبت کیا سّچا ہے۔ سچ پوچھئے تو یہ کتاب  انسان کے دل کا شیشہ  ہے۔ یہ ہر فرد بشر  کو اُس  کی اصلی حالت  بتلا کر اُسے  گویا جا پکڑتی ہے۔  اور یہ امر یعنے اپنے آپ میں ایسا پرُ زور اندرونی  ثبوت  رکھنا اِس امر پر دال ہے کہ یہ کتاب منجانب اﷲ ہے اور  ہر صاحب فکر ( خواہ افریقائی سردار سا وحشی  ہو یا تعلیم  یافتہ  برہمن  کا سااِنلاٹینڈ ہو)  کے غور اور فکر کے لایق  ہے۔

دوسرے امر قابل غور جو ہر فرد  بشر  کے لئے اذحد ضروری ہے وہ  آدم ذاد کی نجات  کا الہیٰ  انتظام ہے۔ یہ مسئلہ بھی مثل  مسئلہ گناہ کے بڑی صفائی سے اِس کتاب میں بیا ن  کیا  گیا ہے  اور سادہ سادہ اور عام فہم الفاظ میں نجات کا الہیٰ  طریقہ  بتلایا گیا ہے۔ انجیل  یوحنا ۳: ۱۷  اور انجیل  متی ۱: ۲۱ وا عمال  ۴: ۱۲ میں یوں مرقوم ہے۔ کیونکہ خدا نے جہان کو ایسا پیار  کیا ہے کہ اُس نے اپنا  ہے کہ اُس نے اپنا  اکلوتا  بیٹا  بخشاتاکہ جو کو ئی اُسپر ایمان  لاوے۔ہلاک نہ ہوئے  بلکہ ہمیشہ کی زندگی پاوے۔ اور وہ بیٹا  جنیگی اور توُ اُس کا نام یسوع  رکھیگا  کیونکہ وہ اپنے لوگوں کو اُسنکے گناہوں سے بچائیگا۔ اور کسی  دوسرے سے نجات نہیں بخشا گیا جس سے ہم نجات پا سکیں۔

اِن آیات کے پڑھنے سے ہم کو اؔول یہ معلوم ہوتا ہے کہ نجات کا الہیٰ طریقہ کیسا سادہ اور عام فہم ہے۔ دوؔم یہ  کہ  کو ئی شخص خودبخود اپنے لئے نجات حاصل نہیں کر سکتا ہے۔ سومؔ یہ کہ ہماری نجات صرف  خدا  سے ہے اور چہاؔرم  یہ کہ  نجات کا الہیٰ طریقہ یہ ہے کہ ہم ایمان لائیں۔ خدا تعالےٰ کہتا ہے آزماؤ۔  پرکھو۔ جس طرح کو ئی  بیمار  چنگا نہیں ہو سکتا  ہے جب تک وہ دوا کو کھا کر  نہ آزمانہ  لیویں ہم نجات نہیں پا سکتے ہیں اگر کوئی بیامر کسی  دوا کو دیکھکر ناحق  کی  حجت  کرے کہ یہ دوا کڑوی  ہے یا اُس  کی رنگت  خراب ہے تو کیا اُس کوحکیم  نہ کہے  گا کہ  اُس کو  کھا کر دیکھ۔ اِس  کا فائدہ کھانے بغیر حاصل  نہ ہوگا۔ اسی طرح خدا تعالیٰ کہتا ہے پرکھو۔ آزماؤ اور مستفید ہو۔

(۳ ) اب ہم زرہ  بائیبل کی عجیب فتوحات پر غور کریں۔ تقریباً  دس برس  گزرے  ہین کہ ہندوستان  کے دارالخلافہ میں ایک بڑی  عظیم الشان  نمایش  گاہ ہوئی تھی۔  ہزارہا وزیٹر تمام دنیا۔ ایشیا ۔ یورپ۔ افریقہ اور امریکہ  سے اُس کی سیر کرنے کو آئے۔ مختلف ملکوں کی عجیب و غریب  چیزیں۔ اِس نمایش گاہ میں دور دور سے بھیجی گئیں ۔ لیکن ایک چیز ایک کمرہ کے ایک کونہ میں تھی جس کو لوگ بڑی  حیرانی  سے دیکھتے تھے۔ یہ ایک گول میز تھی جسکا  ڈایمٹر  ۷ فٹ  کا تھا یہ میز  ایک ہی تختہ سے بنائی ھئی تھی ۔ کہیں اس کے جوڑ نہ تھا۔ کاریگر  خوردبین لگا کر اس کو بڑے غور سے دیکھتے  تھے مگر کہیں کو ئی  جوڑ نہ  پاتے  اور حیران ہوتے تھے۔  مگر طرفہ ہجر ا یہ تھا  کہ اُس  پر اُس  وقت کی  تمام معلومہ  زبانوں  کی ایک ایک جلد بائبل کی دھری تھی۔  یہ ایک نہایت ہی عجیب بات  ہے کہ  جہاں جہاں بائبل گئی نہ صرف وہاں کی لغت اور زبان کو اُس  نے بڑی  ترقی  دی۔ بلکہ لغتیں وجود میں آئیں۔ جہاں لوگ اس قدر وحشی  تھے کہ نہ اُن کی کوئی لغت تھی نہ صرف  تہجی وہاں  پادری  صاحبان نے جا کر اُس وحشیوں کو  اُن  کی زبانوں  میں بائبل دینے کی خاطر لغت کی بنیاد ڈالی۔ حروف تہجی بنائے  اصپ زبان کو تحریر  میں لائے اور اُس  کو رونق دیکر بائبل کا ترجمہ اُس  زبان میں کیا ۔ اب بتائے  کہ دنیا کے صفحہ  پر کیا کو ئی اور کتاب  ہے  کہ جس سے اِس  قدر  فائدے  پہنچے ہیں۔ کیا یہ بائبل کی فتوحات  کا ایک کرشمہ نہیں۔

دنیا میں آج کل  جس قدر تہذیب  نے ترقی کی ہے جس قدر  نئے معلومات  ہوئے ہیں اورہر طرح کی آسایش و  ترقی ہو رہی ہے کیا یہ بائبل کی فتوھات کی ایک نظر نہیں۔

اور آخر کار  وہ  اثر جو یہ کتاب  انسانی  کے دلون پر کرتی ہے۔ شریروں  کو خدا پرست وحشیوں کو تہذیب  یافتہ گنہگاروں کو نجات یافتہ۔ کیا یہ سب اس کی اعلیٰ فتوحات کی نظریں نہیں ہیں۔

(۴ ) پس جس حال کہ اس کتاب کی فتوحات  کا یہ حال  ہے تو کیا مناسب  نہیں کہ اہل فکر  اس کتاب پر غور کریں۔